تنتابني نوبة صداع، وأشعربأنه ثمة شيئ في أم نافوخي يجب أن يخرج..
-أشعر في الفترة الأخيرة بأني أصبحت مثقفًا ويترتب على هذا ان أذكر في ماأكتب بعض الأقوال من هنا على شوية من هناك !
وأنا مؤمن بما قرأته للتو للمُدَوِنة الجزائرية (سارة محمد) بأن أشد سجون الحياة هو السجن الذي يحبس الفكرة.. ولذا فلن أكون عادلي ولاحسن عبدالرحمن ولا إسماعيل الشاعر .. وسأخرج فكرتي أو بالأحرى سأصدعكم ببعض مما يصدعني !
ولأنني مثقف سأذكر قول آخر وهو للكاتب المكسيكي (كارلوس فوينتس): لا أظن أن الكتاب الجيد يتأسس على أي خبرة واقعية، فالكتب السيئة هي التي تتضمن أشياءًا يعرفها الكاتب قبل أن يكتب عنها !!
اممممم..
تصدق ملاحظة حلو ياكارلوس!
لكن كيف للمرء أن يكتب شيئ دون أن تسبقه معرفة عنه؟!
وهناك سؤال أهم: لماذا الصداع لايتركني؟!
فالجو حار جدًا هنان وأنا في قمة الإستغراب.. دا أنا حتى مندهش جدًا وفاتح فمي ع الآخر ورافع حواجبي.. والعملية غريبة ع الآخر !!
لأننا في فص الشتاء بل في أعتى أيامه..(شهر أمشير).. فضلًا على أننا في الصحراء..!
والناس في مصر غريبة.. وأنا كي أطرد الصداع تناولت كوب شاي..
ممكن تنتظرني على ما أعمل الكوب الثاني؟!
.
.
.
.
أنا جيت..
نعم سأتناول الكوب الآخر في غضون خمس دقائق!!
أرجوا ألا تستغرب.. فهناك أشياء أخرى تدعوا لإستغراب أكثر من الشاي.. خد عندك ياسيدي:
أولًا: المخدة المقرة في الخيمة الموقرة التي تعطيها لنا الشركة المقرة التي أعمل بها.. أنا إلى الآن لم أعرف ماهو لون المخدة الموقرة من كثرة السواد القابع عليها!
المتعارف عليه بين البني آدمين أن المخدات إنما وجدت لكي يضع عليها البني آدمين رؤوسهم.. فمن أين جاء هذا اللون الأسود؟!
اللهم إلا إذا كان المتعارف بين من يستخدمون تلك المخدات أنها إنما وجدت لكي يضع عليها البشر أرجلهم بعد جولة محترمة من اللعب في الطين !!
ياعم إستغرب.. دا أنا بكلمك عن مخدة للنوم .. مش حمام علشان البيبييي !!
ثانيًا: ننتقل من المخدة إلى شبه الجزيرة الكورية.. انا أموت وأعرف ليه الجماعة اللي تحت بيكرهوا الجماعة اللي فوق واللي فوق بيكرهوا اللي تحت؟!
هو أكيد أكيد الجماعة اللي تحت فتحوا المياه فاللي فوق المياه قطعت عندهم.. ودا لب الموضوع !!
شفت الإخوات بيتخانقوا مع بعض إزاي.. مع إنك لو جبت واحد من فوق وواحد من تحت وقلت لي مين فيه بتاع فوق ومين فيهم بتاع تحت؟!
تلاتة بالله العظيم ماهعرف!! والله عيبة كبيرة في حق بتوع كوريا دول!
وإحنا ياجدعان لازم نهتم بشبه الجزيرة الكورية.. هو إحنا عندنا كام كوريا؟! هي يادوب واحدة !!
ونفس بعد ماأموت وأعرف اللي حصل فوق.. أصحى وأموت وأعرف تاني ليه الناس اللي فوق مابنسمعش عنهم في نشرات الأخبار؟!
مافيش أي مظاهرة كده أو أي منكش..رغم غن الرئيس بتاعهم عاوز يورث العزبة للمحروس ننوس عينه أمه وأبوه إبنه..
وأنا من ساعة ماشفت المحروس في صورة مع قيادات الجيش هناك مابعملش ألا 3 حاجات:
أول حاجة.. بتابع منتصف اليوم ع الجزيرة علشان أسمع على أي خبر عن الناس اللي فوق..ومافيش.. وصبرت نفسي وقلت أسمع حصاد اليوم.. وبرضه مافيش حاجة!!
بس الصبر حلو.. وانا واحد متعود ع الصبر من أيام المخلوع..
الحاجة التانية..إني تحاملت على نفسي وجبت صور الجماعة اللي ع الكراسي عندنا وقعدت أشوف مين فيهم عينه ضيقة وشعره ناعم وقصير.. وهو دا أكيد يقرب للي قاعد ع الكرسي في كوريا الشمالية وهو اللي عرفه فكرة توريث العزبة للمحروس !
بس تعبت من كتر التدوير واللف في الصورة.. لأن بتاع اليمن قصير بس ماعندوش شعر وبتاع الجزائر قصير بس عينه مش ضيقة.. وكفاية سدة نفس..
الحاجة التالتة: إني برجع أعمل الحاجة الأولانية تاني وبطلت أعمل التانية !!
والمثل بيقول: اللي يتجوز أمي أقوله ياعمي، وإبن التربي أولى بمهنة أبوه، والنشرة بتقول إن مافيش مظاهرات ولا إعتراضات في كوريا، وأنا بقول إن الراجل ده يعرف حد من اللي ع الكراسي عندنا !!
تالت حاجة ممكن تستغربها:
هي إنب مؤمن باللي بدايته غلط، عمره هايضيع هدر.. والدكتور خالد أبو شادي بيقول: (من لم تصح إرادته إبتاءًا فإنه لن يزيده مرور الأيام عليه إلا إدبارا).
وأنا أول ما اشتغلت كنت بقبض 430 جنيه وبعد 6 شهور قبضت 660 وعلى رأي محمد عبد المتجلي: صوتي ياللي مانتي غرمانة وإن كنتي غرمانة برضه صوتي.. المهم إنك هاتصوتي يعني هاتصوتي..!!
والناس في بلدنا مفكرانة شغال في البترول.. عالم فقر منهم لله.. وعلى رأي المثل.. ناس نئها دكر !!
شفت أهو انا مؤمن بحاجات وبأعمل ضدها.. بس لحظة!
أنا برضه بعمل حاجات أنا مؤمن بيها.. ما هو أنا خرجت رأيي زي ماسارة قالت وكمان جبت الفكرة من نافوخي زي ماكارلوس قال..
والدنيا ياصاحبي أبيض وأسود وأنا لغاية شفت الأسود ولسه بدور ع الأبيض.. بس التلفزيون بتاعنا بيقول إن الدنيا بقى لونها بمبي.. وأنا عمال أقول للناس هو في فرح هنا ولا إيه؟! يقولولي لأ.. دا لون الدنيا بقى بمبي..!
بص أنا هاروح أشرب الكوباية التالتة..وأسيبك..
بس أمانة لو شفت اللون الأبيض إبعتلي :)
